上回提到要入產房，換好醫院提供既衫，的衫好得意(裏面乜都吾著，外面著住一件紫色袍，不過條繩係後面綁，我換個陣時心諗，點解要咁著架，條繩係後面點綁呀，無辦法，肉隨砧板上，唯有照做啦。
換好衫，出去坐咗一陣，之後姑娘推咗張牀入黎，叫我瞓上去，然後向產房出發。瞓係張牀上面，心裏面又驚又喜，驚既係生B係味會好痛，要幾耐呢？喜既我可以同我肚裏面既BB見面啦— 短短路程，已經到達產房，入到去，裏面環境好白好光，有好多儀器，見到幾位姑娘己經係到聊聊天，個氣氛都OK，吾算好驚。
首先姑娘叫我過牀先，我知道件紫袍有乜用，佢既作用係好似一張被咁，方便隋時伸手、轉身及檢查。然後同我對吓啲資料，之後開始有姑娘、醫生係我隻左手抽血，插針，好痛但又吾敢出聲。然後又吾知咩紅十字會話抽血吾知做乜，個時痛到矇矇查查，乜都話好，點知係要右手抽血，仲要係3支(吾知有冇記錯呢)，心諗，天呀，抽完左手又抽右手，總之吾應承，唯有死隠啦。之係有個姑娘走過黎，話如果你覺得痛既話，你就用呢個吸盤，就可以減低陣痛既痛楚。吾記得係咩氣體，仲之吸完真係無咁痛。
諗住做完咁多事前玏夫，以為生得啦，因為陣痛越來越痛，點知只開得3度，點解我會知，我隱約聽到啲姑娘講，佢地有部儀器檢查住的。可能未生得關係，啲姑娘就係間房出出入入，而我不斷聽到儀器發出既聲音，同埋隔離房生BB太太的呻吟聲，BB出世既哭聲。此起彼落。
我不斷望住個鐘，時間一分一秒咁過，點解仲未生，我個肚越來越痛，(可能係摧生針關係)，吸氣都好似止吾住。姑娘可能見我咁痛，走過黎問我需吾需要打止痛針，之後佢俾個MENU我，俾我選擇邊個PLANE，打止痛針只可以打一次，如果我而家打，之後藥力過後痛點算呢，而我最後打咗無痛分勉，標明無害，之前聽有啲人話打咗對BB吾好，但我家姐生個時都打過，我心諗應該冇問題，因為實在太痛了。起初我以為係隻手打支針，好簡單啫。原來我低估咗呢支針，佢吾係直接打係手到，而係經背脊落藥水，係有條幼管插入背脊，個種痛，我記得我痛到忍吾住叫咗聲，之後你會感到有啲涼快既感覺，真係無咁痛，姑娘話如果你覺得痛，你可以按個制，啲藥水就會落，不過要記住按咗幾多次，由於太攰關係，不知不過瞓著咗，之後又痛醒，一路係咁吸氣，因為我想盡量吾用無痛個隻，望一望時間已經係不午，係我迷迷糊糊之間，姑娘拿著電話俾我，話我屋企人揾我，原來係我大姐，因為太耐關係，所以好擔心，問吓狀況，如是者，時間去到黃昏，當姑娘替我檢查温度，發覺我正發緊燒，我同佢講我想飲水，佢話吾可以食野同飲水，之後俾咗條濕毛巾我濕吓個口。但果陣度數開度8到就停咗，咁醫生話要抽啲組織檢查，但由於BB掉咗頭關係，所以係頭頂抽，不過醫生話冇事，吾會影响BB的。之後過咗一陣間，一個醫生就行咗入黎，跟姑娘問吓狀況，我隠約聽姑娘問醫生須吾須要開刀(我心諗，痛咗咁耐，先話要開刀，我吾想經歷2次痛。醫生問姑娘度數開到幾多，姑娘答咗之後，醫生話準備生，不過要吸BB出黎。佢地話吸BB出黎，個頭仔會有少少拉長，之後大啲就吾會。
姑娘首先叫我將雙腿分開，然後放係果架度，然後開始生花B了。起初佢地叫我用力屙佢出力，我不斷重覆呢個動作(吾.......吾.......深呼吸、吾............吾.........)之後佢地會讚你做得好，無言係精神上俾咗啲鼓勵你，過咗一陣，佢地話頭仔出緊黎，叫我用力屙，但又吾俾我出聲叫出黎，要我留番啲氣力生。我不斷用晒我身上所有氣力屙，之後冇晒痛既感覺、全身鬆晒，原來醫生吾知幾時吸咗花B出黎喇，果一刹那，所有既痛，已經抛諸腦後，換來係一種幸福`喜悅。之後姑娘可能幫花B抺身，我第一次聽到花B喊，雖然吾係好大聲，但已經好感動，之後姑娘抱住花B，近佢黎俾我睇，好似發緊夢，懷住花B咁耐，終於可以同佢近距離接觸，回想起所有痛苦，通通都值得的。(完)
留言列表
