記得2010年1月5日那天，我感到很疲倦，同時健康院姑娘替我摸肚時，話BB個頭仔已落到好低，所以我就提早兩日放產假，仲記得果晚，我去完家姐屋企玩，之後慢慢散步回家，都無乜異檥，仲諗緊明天打邊爐(正呀有得食)。果晚沖完涼，上床訓覺，點知我隔離果隻野(我家姐)講電話，嘈住晒，我呢啲大肚婆訓覺係吾嘈得架嫲，所以鬧咗佢幾句，然後繼續訓，點知人有三急，去完厠所，繼續訓，突然覺得(果度)濕濕地，走去厠所睇無野呀。繼續訓啦，吾係喎—好似真係濕濕地，走去厠所睇，條(底底)有水喎，我聽人講過，呢啲可能穿羊水，果一刻好驚，同我三家姐講，喂—我穿咗羊水，佢就彈起身，即刻打電話俾我大家姐(因為佢生過嫲，有豐富既經驗)，佢叫我即刻去醫院，個時已經係零晨2點幾，對一個未生個既人黎講，個一刻，我全個人震晒，有啲束手無策，同時又好高興，因為就快可以同我肚裡面既BB見面。 同時，即刻打埋俾條佬，佢聽到，當然就好緊張。就開架車黎接我。
而我一早執咗既走佬袋，換件衫就出去了，去醫院途中，我完全控制吾到自己，對手不停震，完全吾受我控制，心裡又驚又雀躍。去到醫院，已經係零晨2點幾了，即刻上去婦產科，老公就去泊車，果個姑娘首先叫我入房仔，問長問短先，然後叫我瞓係牀度檢查，我話我穿羊水，佢幫我檢查，話我仲未開(個晚果個姑娘態度嫲嫲地)。之後叫我換套醫院衫，檢查完就出去辦入院手續，我家姐幫我辦入院手續，而我就跟住姑娘入房了，入到房見到好多大肚婆瞓緊，姑娘安排咗牀俾我後，叫我瞓上去，無幾耐﹐佢地推著部機去到我牀邊，將一條腰帶西環住我條腰，然後俾個制我，同我講話如果bb郁既話，就按一下。我不斷聽到部機好似掃瞄，發出聲音。
過佐一陣，姑娘走過黎望吓，(個陣我都吾知做乜，好似個公仔咁。人地叫你做乜你就做乜)，姑娘睇完報告後，話要做多次，我心諗吾係掛，又吾郁得，做吓都要半個鍾，佢話bb郁得太勁，啲數據吾清，再黎多次，好彩呢次一陣間就得，之後姑娘話我無咁快生，叫我同的屋企人講，叫佢地返屋企先。而我就好lonely咁係醫院留宿。
由於下面濕濕地、見紅，同埋檢查院，覺得好污糟，就去洗白白。而家諗番，都覺得自己堅，係零晨4點幾，自己走去浴室，仲要係無人環境下，(你知醫院俾人感覺，冷冰冰的) ，係果一刻真係無諗過呢啲野，沖涼後，上番牀瞓，當然未瞓得著，聽到有啲大肚婆呻吟聲，新症既機聲，此起彼落。無幾耐。攰得制，瞓著咗了。(待續.............)
留言列表
